Isang Pagsusuri sa Maikling Kwentong
“ Di- Maabot ng Kawalang Malay” ni Edgardo M.
Reyes
ni Jennifer Lazaga*
I. Panimula
Madalas
nating marinig ang sinasabi ng maraming tao na upang maging maayos ang lahat ng
mga bagay na gagawin natin ay maging mapagmasid at maalam sa lahat ng
larangan. Hindi dapat ipagwalang bahala
ang mga bagay na mahahalaga bagkus pagtuunan ito ng pansin sa abot na makakaya. Unawaing mabuti ang kalagayan at katotohanan
ng mga pangyayari.
Ngunit, paano kung di abot ng
kaisipan ang tayog ng nais bigyang kahulugan?
Si
Edgardo M. Reyes ay isang kilalang manunulat na Pilipino. Marami na siyang
pinagwagiang akda. Isa siyang kwentista, nobelista at makata. Sinasabing ang
kanyang mga akda ay istatiko at sikolohikal. Ilan sa kanyang mga sinulat na
nagwagi na sa Gantimpalang Palanca ay ang nobelang “ Sa Mga Kuko na Liwanag” at
“ Laro sa Baga”.
Ang
kanyang maikling kwentong “Di- Maabot ng Kawalang- Malay” ay isa rin sa mga
nagwagi sa Gantimpalang Palanca.
Nagkamit ito ng unang gantimpala sa nasabing patimpalak noong taong
1959-1960. Ang maikling kwentong ito ay hinggil sa dalawang batang babae na
walang alam ( inosente) sa buhay. Sa kanila umiikot ang kwento. Ang di nila
lubos na pagkaunawa sa katotohanan ng buhay ay isang napakagandang suriin upang
maunawaan ang masalimuot na buhay ng
tao.
Narito
ang katangiang pampanitikan ng maikling kwentong “Di- Maabot ang Kawalang-
Malay”:
Anyo
ng panitikan: Tuluyan. Ito
ang naisulat sa katutubong daloy ng pangungusap.
Uri
ng panitikan: Maikling
kwento
Paksa: Inosenteng
pagtanaw sa inosenteng pananaw ng dalawang
batang sina Ida at Emy ukol sa mga pangyayari sa kanilang paligid.
Tunggalian: Ang pagpasok ng Ina
ni Ida sa ganoong uri ng trabaho (prostitusyon) dahil sa karamdaman ni Obet at
dahil na rin sa kahirapan ng buhay.
Istilo:
Ang
pagkakagamit ng mga salitang karaniwang ginagamit ng mga bata.
Kasukdulan: Ang pagmamadali ni
Ida na makarating sa tahanan nina Emy
upang ibigay ang usang supot ng pansit.
Kakalasan: Ang pagdating ng
Ina ni Ida na may dalang gamot at pagkain para sa kanila.
Wakas: Si Ida ay
nadapa at ang supot ng pansit ay sumambulat sa may lubak sa kanal.
II.
Katawan ng pagsusuri
Buod
Sa isang bakuran naglalaro ang
dalawang batang babae. Sila ay sina Emy at Ida. Magkasinggulang sila. Si Ida
ang taya. Tahimik niyang hinahanap si
Emy. Nang matagpuan niya si Emy, naisipan ni Ida na umuwi na dahil walang nagbabantay
sa kanyang kapatid na may sakit. Sumama si Emy kay Ida sa kanyang pag-uwi.
Naisip nila na sa bahay na lang nina Ida maglaro upang Makita si Obet- ang
kapatid ni Ida. Tinanong ni Ida kung hindi ba siya hahanapin si Emy ng kanyang
mga magulang. Nabanggit ni Emy na nasa sugalan ang kanyang ina.
Sa barungbarong na bahay nina Ida,
nadatnan nila si Obet na tulog pa. Minabuti nila na magkwentuhan muna sa may
hagdanan.
Sa kanilang pag-uusap, nalaman ni
Emy na patay na ang tatay ni Ida. Ito ay
isang pulis. Naikwento naman ni Emy kay Ida na pinag-uusapan sa may tindahan
ang ina ni Ida. Maganda raw ang kanyang ina at nagsusuot ng magagandang damit
sa tuwing lumalabas ng kanilang bahay. Ayon kay Ida, minsan ay umuwi ang kanya
ng ina na may dalang maraming pera kaya naipagamot si Obet noong may sakit ito.
Dumating ang gabi at nagpaalam ng
umuwi si Emy dahil nagugutom na siya. Gutom na rin noon si Ida sapagkat isang
pandesal at lugaw lang ang kanyang kinain buong maghapon.
Naghintay
si Ida sa pagdating ng kanyang ina. Sabik na sabik siyang sumalubong nang
dumating ang kanyang ina. Ang kanyang ina ay may dalang pagkain, at gamot para
kay Obet. Dahil sa labis na pagkagutom, nilantakan ni Ida ang pansit na dala ng
kanyang ina.
Malungkot
ang kanyang ina habang pinagmamasdan siyang kumakain. Naaawa siya sa hirap ng
kanilang kalagayan. Hindi naubos ni Ida ang pansit kaya naisipan niyang
magpunta kina Emy upang ipakita na kahit papaano ay kumakain din sila ng
pansit. Nagpaalam siya sa kanyang ina upang dalhin ang pansit sa bahay nina Emy.
Sa
kanyang paglalakad sa madilim at makitid na daanan, nagkatisud-tisod siya
hanggang sa tuluyang madapa at sumambulat ang pansit na humagis pakalat sa may
lubak sa kanal.
Pagsusuring Pormalistiko
Naging
kawili-wili ang pagsisimula ng kwento dahil simula pa lang, naipakita na ng
awtor ang katunayan ng kanyang pamagat na “Di- maabot ng Kawalang malay” sa pamamagitan ng mga tauhang
naglalaro na sina Emy at Ida. Sila ay
tunay na larawan ng “kawalang malay” na ang tanging hangad ay maglaro at tumawa. Maayos din ang pagtatapos ng kwento dahil ito
ay isang bukas na pagtatapos (open-ended). Ang pagsambulat ng pansit ay isang
palaisipan na sa musmos na pag- iisip ng mga bata ay walang ngang mahalaga sa
kanila kundi ang maipakita sa iba kung ano ang mayroon sila at kung ano ang
maaari nilang gawin sa mga bagay na mayroon sa kanila. Hindi na nila iniisip kung saan galing ang
mga bagay na ito na nasa kanila.
Maiiwan sa mga
mambabasa ang malungkot na pakikiramay ng mga tauhan sa kwento. Awa o pagkahabag
kay Obet ang maiiwang bisa sa damdamin, dahil naman binanggit sa kwento kung
gumaling ba siya o hindi.
Ang
mga salita o dayalogong ginamit sa pag-uusap ng dalawang bata ay karaniwang
ginagamit ng mga batang nasa edad nina Emy at Ida. Naging mabuti ang
pagkakagamit nito sa maikling kwento dahil ang paraan ng pagkakasulat ng mga
ito sa akda ay nagsasaad na ang mga pangunahing tauhan sa kwento ay mga bata.
Sa paraang ito, nakatutulong sa mga mambabasa ng akda upang iakma o ilagay nila
ang kanilang sarili at damdamin sa nilalaman ng kwento. Ang pagkakagamit at ang
mga ginamit na salita ay naglalarawan ng kawalang-malay at kainosentehan ng mga
bata. Halimbawa ay ang mga salitang “ewan” at “di ko laan” na dapat sana’y “
hindi ko alam”. Isa pang patunay, tungkol sa pangungulila sa ama na maagang
namatay, si Ida ay nagpapaalala sa mga mamababasa ng mga katotohanan ng buhay
na kahit tila musmos ang istilo ng pagsasalita niya ay naroon ang mensahe; na
mahirap mawalan ng isang ama. Sa kabuuan, ang kwento ay sumsalamin sa
kasalukuyang mga nangyayari sa ating paligid at ibig ipakahulugan sa mga
mambabasa tungkol sa kamalayan sa ating mga pamumuhay.
Kung
susuriin pang mabuti ang akda, mapapansin na hindi ito ginamitan ng anumang
matatalinghagang pahayag o anumang tayutay sa paglalahad ng mga
pangyayari. Bagkus, ginamitan ito ng
mayamang talasalitaan tulad ng talaksan,
nangingipapal, tiklis makutim at iba pa.
Magpagayunman, lalo namang ikinaganda nito ang hindi paggamit ng mga
pahayag na matalinghaga at tayutay dahil sa paraang ito lamang maipaparamdam
ang “mundo” ng mga batang pangunahing tauhan—karaniwan ang mga salitang
ginagamit sa usapan at kung ano ang maisip ay iyon lamang ang sasabihin. Naging mabisa rin ang mga paglalarawang
gunamit sa kwento. Ang mga salitang,
bilugang mata, makutim na damit, tumaas- bumaba ang manipis na dibdib. Sa pamamagitan ng mga salitang ito ay
nagkaroon pa ng malawak na pagtingin ng mga mambabasa sa mga nangyayari sa
kwento.
Pagsusuring Panlipunan
Pamilya
ang pinakamaliit na bahagi ng isang lipunan.
Mahalaga ang pamilya sa pagbuo ng
isang lipunan. Ang lipunang ginagalawan
ng tao ay samu’t sari. Magkakaiba sa
napakaraming dahilan depende sa uri ng mga taong nakatira dito. Mapalad ang isang pamilya kung ang lipunang
kinabibilangan nila ay kasama sa masasabing may maalwang buhay. Isang lipunang, masinop, malinis at
payapa. Kaawa- awa naman ang mga tao sa
lipunan na mamumulat sa isang magulo, marumi at mapanganib na lipunan.
Sa
kasalukuyang panahon, marami ang kabilang sa pangalawang uri ng lipunan. Isang lipunan na kung minsan ay siya pang
bumibiktima sa mga nakatira dito.
Ang
maikling kwentong ito ay may malaking impluwensya sa moralidad ng isang tao,
gayundin sa pakikitungo sa lipunan. Ang
lipunang ginagalawan ng dalawang bata sa kwento ay makatotohanan. Ganito ang
paglalarawang ginamit ng awtor upang maipakita ang lipunang ginagalawan ng mga
tauhan sa kwento:
“ Nagpako ang tingin sa dram ng
tubig sa may gripong labahan, sa yerong
nakatabing sa naglalawa at mabahong pusalian, sa tabinging tiklis na tapunan ng
mga basurang nilalangaw sa gilid ng eskinita, sa matayog na poste ng ilaw sa labas ng bakod na alambreng may tinik .”
Ito
ay katulad ng mga larawang nakikita ngayon sa kamaynilaan,ganoon na rin sa
ilang mga probinsya sa kasalukuyan.
Sa
paglalarawan ng kapaligiran na kanilang ginagalawan, masasabing sila ay
nakatira sa pook- iskwater. Ang kathang ito ay salamin ng mga nagaganap sa
totoong buhay lalo na sa mga pook ng mga dukha at iskwater.
Larawan
ng kahirapan ang ipinakikita sa kwento na katulad- na katulad ng marami sa mga
lugar sa Pilipinas sa kasalukuyan--
maraming bata, marumi ang paligid, kulang sa pagkain at idagdag pa ang
kaguluhan ng lugar.
Tiyak
ang usaping nais ilantad ng maiking kwento.
Usaping mahirap at mayaman.
Usapin sa kawalan ng pagkakapantay- pantay. Minsan maiisip ng tao kung bakit habang
nagpapakaligaya ang iba sa kagandahan ng buhay ay lunod na lunod naman ang
marami sa kahirapan. Ito ay isang usapin
na dapat mabigyan ng kahulugan at maliwanagan sa kasalukuyang buhay ng tao.
Ngunit
ano ang mga dahilan kung bakit ang isang tao ay nasasadlak sa kahirapan ng
buhay? Sanhi ba ito ng mismong lipunang
kanyang ginagalawan? O sanhi ng hindi
paghahanap ng tao ng kanyang mabuting kabuhayan?
Kung
bibigyan ng kahulugan ang isang bahagi ng kwento, bagamat hindi tuwirang sinabi
ng manunulat kung ano ang trabaho ng nanay ni Ida ay mahuhulaang siya ay isang
babaeng nagbibigay- aliw kapalit ng salapi. Binigyang diin ito sa pamamagitan
ng pahayag ni Ida na:
“tuwing umaalis ang aking ina kagaya nang unang
magkasakit si Obet, nang magbalik ay may pera na sila at naipagamot nga si
Obet.”
Sa
panahon ngayon laganap na ang prostitusyon dahil sa hirap ng buhay. Marahil ay nagawa lamang ng nanay ni Ida na
pasukin ang ganong uri ng trabaho dahil hindi nakapagtapos ng pag-aaral. Minsan kahirapan ang sinisisi kung bakit ang
isang tao ay nasasadlak sa ganitong uri ng trabaho. Marahil, totoo rin naman ang sinasabi ng
marami sa kasalukuyang panahon, patuloy ang pagdami ng tao. Ika nga nila’y may “population boom”. Dahil dito ay hindi na nakasasapat ang
pagkain dahil ang dating mga sakahan ay tinayuan na rin ng mga barungbarong o
kung hindi man ay mga malalaking pabrika.
Hindi makahanap ang marami ng trabahong makasasapat para sa araw- araw
nilang panganagilangan kaya’t naghahanap ng iba pang alternatibo. Kaya ang pinakamabilis na paraan ay ang
“pagbebenta ng laman”. Hindi na iniisip
ang karangalan ng sarili mairaos lamang ang pang- araw- araw na
pangangailangan.
May
implikasyon ito sa kasalukuyang pamumuhay ng mga Pilipino, “kapit sa patalim”
dahil sa kahirapan. Ang mga babaeng labis ang kahirapan ay talagang napipilitan
ng pumasok sa ganitong uri ng trabaho upang masuportahan ang kanilang pamilya.
Ang
katulad ng mga pangyayari sa kwentong ito ay hindi rin nalalayo sa kasalukuyang
buhay natin ngayon. Sadyang mahirap ang
buhay kaya marami ang patuloy na naghahangad ng kaginhawaan at lahat ng paraan
ay maaari nilang pasukin. Biktima ng
pangangailangan ang ina ni Ida. Katulad
siya ng mga babae na naghahanapbuhay sa gabi upang may pantawid- gutom. Kahirapan ang totoong dahilan kung bakit
lalong dumarami ang mga nasasadlak sa ganito “karuming’ trabaho ng mga
kababaihan.
Isama
na rin ang mga dahilan katulad ng kakulangan sa napag- aralan, problemang
pampamilya kakulangan sa trabahong maaaring mapasukan. Ang lipunan natin sa kasalukuyan ay hindi
nalalayo sa ginagalawan ng mga tauhan sa maikling kwento. Ang umpukan ng mga tao sa isang lugar upang
magkwentuhan imbes na magtrabaho, ang pagdami ng mga taong walang matuluyan,
ang pagkain ng isa hanggang dalawang beses lamang sa isang araw, mga batang sa
murang gulang ay hindi na pumapasok sa paaralan at marami pang iba. Lahat ng ito ay tagapaghatid ng isang
kaisipan na “hindi maabot ng kawalang
malay”
Maraming
programa ang kasalukuyang pamahalaan ang ipinatutupad upang malutas ang
ganitong suliranin sa lipunan. Ilan sa
mga ito ay ang patuloy na magtawag ng TESDA ng mga kababaihan at kalalakihan
upang magsanay para sa kanilang kabuhayan.
Ngunit ilan ang tumugon at nagpatuloy?
Taun- taon, nagkakaroon ng “Job Fair” mabigyan ng trabaho ang mga
mamamayan gayunpaman ilan lamang ang tunutugon dito. Isang dahilan kung bakit at dahil hindi naman
nagtutugma ang napag- aralan ng isang aplikante sa trabahong kailangan. Maliban pa rito marahil isa pang dahilan ay
ang hindi sapat na pinag- aralan ng mais magkatrabaho. Ano ang mangyayari sa mga hindi makakapasok
sa trabaho? Maghihirap at maghahanap ng
ibang mapagkakakitaan.
Marahil
ay pinakamabisa pa rin ang pagtitiyaga upang makapaghanap ng marangal na
trabaho. Kung hindi man makahanap ay
maging matalino sa pag- iisip kung ano ang maaaring pagkakitaan na hindi
naisasaalang- alang ang sariling karangalan.
Hindi lamang sana makalimot sa Panginoon sapagkat Siya pa rin ang
pinakahuling sandalan ng bawat taong nakikipagbuno sa marahas na lipunan ng
tao. Isaisip palagi na “Nasa Diyos ang
awa; Nasa tao ang gawa.”
Pagsusuring Moralistiko
Malinaw
na nailahad sa kwento ang moralidad o aral na ipinahihiwatig nito.
Una,
kaugnay ng kwento, may mga magulang na sadyang pabaya sa tahanan. Tuloy
napapabayaan ang mga anak nila dahil sa paglalaro ng baraha o pagsusugal. Masasabing kahit mahirap na nga ang buhay ay
nagsusugal pa rin ang mga tao. Mahilig silang makipagsapalaran at umaasa na
lang sa swerte. Ang salaping hindi pinagpapaguran
ay madaling mawala, at ang salaping galling sa sariling pawis ay naibibili nang
tama.
Pangalawa,
ang matinding lungkot sa mukha ng ina habang kumakain ng pansit si Ida ay
palatandaan ng pagkaawa niya sa anak.
Ang papel na ginagampanan ng ina sa paghahatid ng mensahe ay
epektibo. Kahit hindi siya gaanong
nagsasalita ay naiparating niya sa mga mambabasa ang paghihirap ng kanyang
kalooban dahil sa dinaranas ng mga anak.
Maaari ring napipilitan lamang magtrabaho ng ganoong uri ng trabaho
dahil sa tindi ng pangangailangan at sa kanyang pagmamahal sa kanyang
anak. Gayunpaman, ang ginawang paraan ay
hindi pa rin naman sagot upang gumawa ng hidi mabuti o pasukin ang isang
trabaho na lihis sa karapatang pantao at pansarili.
Hindi
kailangang maging bata upang maiwasan ang ganitong pangyayari dahil sa
kasalukuyan at totoong buhay nangyayari ang mga ganitong pangyayari. Kailangang
maimulat sa mga kabataang ang ganitong uri ng pamumuhay upang magsilbing hamon
upang magpursigi sa pag-aaral dahil sa panahon ngayon, mahirap ang walang
tinapos na kurso. Sana
ay gabayan ng mga magulang ang kanilang mga anak tungo sa magandang
kinabukasan.
Kung
bakit marami ang mga taong nagbebenta ng sariling laman para mabuhay ay isang
usapin ukol sa moralidad. Hindi tama na
gamitin ang sarili kapalit ng salapi.
Hindi wasto ang “Kalakal sa laman” na sinasabi ng isang programa sa
telebisyon. Ang kahirapan ay hindi
dahilan upang ang sarili ay dungisan.
Maraming maaaring gawin na higit na marangal kaysa ikalakal ang sarili. Maging matalino sa pagpapasya. Bigyan ng respeto ang katawan na “hiram”
lamang ng tao sa Diyos.
III. Pangwakas
Naipakita
ng awtor ang tunay na kagandahan ng maikling kwento sa pamamagitan ng mabisang
paghahatid niya ng mga damdamin katulad ng lungkot. Ang mensahe ng kwento ay tungkol sa
“kawalang –malay” ay ukol sa dignidad at katayuan sa buhay ng mag- iina. Masasabing ito’y sumasalamin sa totoong
buhay dahil nailarawan nito nang mabuti ang sa kahirapan sa buhay- mga taong nakatira sa mga barungbarong,
pagkakasakit o malnutrisyon, kawalan ng sapat na edukasyon, laganap na
prostitusyon at marami pang iba. Ang
akda ay isang mabuting halimbawa upang
himikayat ng mabuting inspirasyon na kailangang maging mabuti sa sarili at
kailangang magsikap upang makamit ang hangad sa buhay. Sa pagsisikap ay kailangang gumawa ng mabuti
at huwag pasukin ang isang uri ng gawain na makasisira sa sarili at sa
kapwa. Hindi natin maiiwasang “kumapit
sa patalim” alang-alang sa ating mga mahal sa buhay. Ngunit anu’t ano pa man,
lagi sana nating tandaan na maraming paraan upang kumita ng salapi.
Ilan sa mga
dahilan kung bakit dapat hangaan ang may- akda nito ay dahil binigyang diin ang
pagpapahalaga at mga pananaw sa mga bagay- bagay na nangyayari sa ating buhay.
Hindi lamang ng kahulugan ng teksto ang binigyang diin at pansin kundi pati ng
kahulugan ng buhay.
* Nasa
ikalawang taon sa pag- aaral ng kursong BEED- GEE (SY 2008-2009). Nagtapos ng 9 units na asignaturang Filipino
sa kolehiyo bago kumuha ng Kontemporaryong Panitikan,.
nais ko pong makakuha o makabasa man ng buong storya ng kwentong ito, may makikita ba ako nito sa internet? kasi puro buod lang ang aking nakikita. At kung sa aklat kaman nag basa nito maari mo bang ibahagi kung ano ang pamagat ng aklat na ito. KINAKAILANGAN KULANG PO ANG KOPYA NG BUONG KWENTO SALAMATTTT.
TumugonBurahin